|
أبناء عيلة مار شربل يأتون من كل المناطق اللبنانية إلى عنايا كل ليلة جمعة... نقطع مسافات طويلة للتعليم والمشاركة وكسر الخبز والصلاة... كلنّا مدعوّين... قدّاسنا في عنايا مميّز بالمشاركة... من الصلاة التي تسبق التعليم ثم المقدمة إلى الشكران... ويلي القداس صلاة المسبحة التي ننشر ايضاً في هذا الباب تأملاتها... محتويات هذه الصفحة تُنشر باللغة العامية كما تتلى في عنايا دون أي تعديل.
تبدأ السنة الطقسية الجديدة 2007 - 2008 الأحد 4 تشرين الثاني 2007 بأحد تقديس البيعة.
السنة الطقسية مثل السنة المدنيّة تتألف من 52 اسبوعاً ومثلما تتكون السنة المدنية من دورة الأرض حول الشمس، كذلك تتكون السنة الطقسية من دورة الكنيسة حول المسيح. الكنيسة في دورتها حول المسيح ترافقه في تدبيره الخلاصي من ميلاده وعماده، صومه وآلامه إلى قيامته وصعوده وإرساله روحه القدوس على التلاميذ، حتى مجيئه الثاني، مستعدّة لذلك بالصلاة ومقتضيات الرجاء بتحقيق الملكوت. يعّلمنا المجمع الفاتيكاني الثاني، أنّ أمّنا الكنيسة المقدّسة ترى من واجبها أن تحتفل بالعمل الخلاصي الذي أتمّه عروسها الإلهي بما تحييه من ذكرى مقدّسة في أيّام معيّنة طوال السنة.
زمن العنصرة المجيدة
المقدمة:
المجد لله، دايماً لله. باسم رئيس وجمهور دير مار مارون عنايا وباسم عيلة مار شربل منرحب بكل الحاضرين معنا اليوم وخاصة يللي عم بيشاركونا لأول مرة بقداس العيلة. بيحتفل بالذبيحة الالهية الأب ... اخوتي نحن بعدنا بزمن العنصرة وبهل الزمن المبارك منطلب من الرب يسوع بقوة روحه القدوس يزيدنا محبة يعطينا نعمة والصبر حتى نحمل بعضنا ونحترم أفكار وأرائنا المتنوعة وهيدي مسؤوليتنا كلنا بهالوقت الصعب يللي عم يمرق في بلدنا لبنان، بس المسيح بقلنا لا تخافوا (ثقوا اني غلبت العالم) بهالايمان والرجا المسيحي والثقة بالرب يسوع منوضع كل نوايانا بالسلة على درج المذبح ومنطلب التوبة من الرب على كل خطايانا بواسطة الكهنة يللي ناطرينا بكراسي الاعتراف. القداس على الصفحة ... قداس مبارك للجميع.
نية العالم الشر هدفو يحد من قدرات الله حتى يحول الخير اللي فينا لخراب. منرفعلك يا رب صلاتنا على نية العالم حتى يهتدي للنور الحقيقي، للكلمة يللي بتبني والمسيرة اللي بتوصل للفرح الحقيقي والحياة الأبدية.
نية الإنجيل.
القلب الما بيغفر بيحزن قلب الله. الرب عم يدعينا اليوم لفعل الرحمة بين بعضنا البعض بدون شروط ولا قيود، تماماً متل ما هوي بيرحمنا. بارك يا رب كل قلب عم يترجى الرحمة وبيطلب الغفران، عطي الوداعة والتواضع حتى يوصل المحبة للآخرين.
نية عيلة مار شربل والمكرسين.
الحصاد كتير والفعلة قلال، أرسل يا رب فعلة لحصادك، منذكر بصلاتنا كل الرهبنات والكهنة والمكرسين لخدمتك بهالعالم ومنخص بالذكر الرهبنة اللبنانية المارونية. يا بيّنا السماوي امنح كنيستك دعوات جديدة وكهنة قدّيسين بغاروا على خلاص النفوس وعلى ملكوتك، اجعل يا رب كل كاهن قديس سكران بحبك على مثال بيّ عيلتنا مار شربل واجعل من هالعيلة رسالة بألب مجتمعنا ووطنّا المحروم رسالة تبشير ومحبة. منسألك يا رب
نية قداسة البابا بنديكتوس السادس عشر لشهر حزيران 2008
كي يُعنى كل مسيحي بإقامة علاقة صادقة عميقة وشخصية مع المسيح ليستطيع ان يوصل محبته للمسيح الى كل إنسان يلتقي به. ولكي يساهم المؤتمر القرباني العالمي المنقعد في كندا في فهم اكبر للافخارستيا بانها قلب الكنيسة ونبع العمل التبشيري.
السلة
عامة.
"أنت يا رب تعرف كلَ شيء و تعرف أنني أحبُك حبًا شديدا"
بمحبَة بطرس و غيرة بولس، جايين لعندك يا رب بها اللَيلة تتلمس قلوبنا و تحوَل زويانا العقيمة لأرض خصبة تثمر شهادة لمحبتك. - مع بولس اللي طبع صورة الزواج بالحب والإحترام، منسلمك يا رب كل شاب و صبيَة جمعهم حبَك و قرروا يكملوا سوا مسيرة حيلتهم. منصلَي مع … و مع كل زوج و زوجة حبَوا يشاركوا معك بنعمة الخلق، منطلب منك يا رب تطعَم حياتهم من حياتك، تيعطوا حياة جديدة تكون شاهدة لفيض محبتك. من صلَي مع … مع بطرس اللي نادى بالمحبة والغفران، منسلَمك يا رب كل عيلة دخل عليها الخصام والبغض. ازرع يا رب الحوار والتفاهم بين أفرادها تما يتخلَوا عن المحبة اللي إنت وصيتنا فيها. منصلي مع … - "من أنت يا رب؟". هيدا سؤال بولس لمَا كان قلبو بعدو بظلمة الجهل. بنورك نوَرت قلبو وعقلو. وبها النور منطلب منك يا رب تنوَر شبيبتنا اللي بعد ما سمعت صوتك و بعد ما فهمت إنَو ما في سعادة بلاك و ما في سلام إلآ معك. منسلمك … - "يا معلَم، تعبنا الليل كله و لم نصب شيئا، لكن لأجل كلمتك القي الشبكة". مع بطرس، منسلمك يا رب كل الأشخاص اللي مآمين بكلمتك وطلبوا صلاتنا. منصلي مع … بشفاعة مار بطرس و بولس منك يا رب منطلب.
مرضى:
"من يضعف و لا أضعف أنا ؟" مع بولس، منسلمك يا ربّ كل الأشخاص اللي تقل عليهم حملهم ونسَاهم فرحهم ورجاءهم. اعطيهم يا رب الثبات والصبر تيشاركوا جروحاتهم مع جروحاتك، وآلامهم مع آلامك منصلي مع ... بشفاعة مار بطرس و بولس منك يا رب منطلب.
موتى:
- مع بطرس وبولس، هالعنقودين اللي عصرهم نيرون فارتوت الأرض بخمرهم، منسلمك يا رب شهداء وطنَا وجميع أمواتنا. ضمهم يا رب لجماعة قديسيك وارحمهم بملكوتك. منسلمك ... بشفاعة مار بطرس و بولس منك يا رب منطلب.
الشكران
" لا تلميذ أعظم من معلمه ولا خادم أعظم من سـيّده " يا أبانا ، انت يللي جعلت روحك القدوس يحكي فينا، وانت يللي بعدك لليوم عم تقشع وتسمع صوت شعبك يللي بينكرك أكتر من مرة، وانت الوحيد يللي بتحررنا من الخطيئة يللي منتعرضلها. منشكرك. يا يسوع الاله الحي المتجسد منشكرك، منشكرك على كلمتك بالانجيل، المقياس يللي بنـّور حياتنا، منشكرك لأنك اخترتنا لنكون ركن لكنيستك، هالصخرة يللي واقفة بوجه قوى الشر بالعالم كل. يا روح القدوس منشكرك على اختيارك قلوبنا مسكن لالك، لحتى تنور دروبنا وما تتركنا نمشي بالعتمة ونغرق بالظلمة. منعاهدك يا يسوع، الليلة وكل ليلة انو نكون أعمدة قوية ومتجذرة بقلب كنيستك على مثال الرسولين بطرس وبولس. الك المجد من هلق والى الأبد. آمين.
المسبحة
1- يا اله الأرض والسما، تجسّدت بقربانه صغيرة وصرت محور الكون وتجسدك ما هوي الاّ الدليل على حبك العظيم لالنا. هالحب اللي فيه طاعة وأمانة للآب، انسحاق وتواضع حتى بذل الذات، حتى الصليب، هوي نبع ما بجفّ. علّمنا كيف بالتواضع منرتفع لالك، وقلبنا يصير متل قلبك، وعقلنا وتفكيرنا متل تعاليمك. املك على كياننا حتى نتحد فيك وتتجلّى صورتك فينا حتى نمجّد اسمك القدوس هلق وللأبد. منصلي هالبيت من المسبحة على نية محبتنا للآخرين قدّيش يا ربّ قادرين نحب ونعطي من وقتنا وحضورنا وفكرنا؟ اعطينا يا رب قلب طاهر ونقي حتى نكون اداة للخير والمحبة مع بعضنا البعض، آمين.
2- منتأمل بالبيت الثاني من المسبحة بالنعم والهدايا والغنى الروحي اللي بتفيضو الذبيحة الالهية على المؤمن. بقيامتك اعطيتنا الحياة وصرنا أبناء القيامة مش أبناء الموت. الافخارستيا هالعطية السريّة المجانية من الآب ما هي الاّ الطريق صوب النور، صوب الاتحاد فيك، فِيا قوة وايمان وشكر وتسبيح للرب على كل عطاياه. وُهبت لالنا حتى نتحوّل ونتقدّس ومسيرتنا تكون مسيرة توبة وغفران. نعم يا ربّ عطاياك ما بتنتهي الاّ بانتهاء الحياة وهالحياة هي ازلية خالدة. منقدّم هالبيت عنية كل الشهداء الأبرار والموتى حتى يكونوا عم ينعموا بالحياة بالعرش السماوي.
3- بالبيت الثالث من المسبحة منتأمل كيف بالقربان في شراكة والجماعة هي جسر بين المذبح والعالم. نحن منرفع عقولنا وقلوبنا نحو الآب ومندخل بعالم الملائكة أي منتحرر من معطيات ومحدودية الأرض، نحن مدعووين انو نعيش من خبز السما ونذوق طعم الملكوت وقديّ هوي طيِّب لأنو خبز الحياة. بيصير في شراكة بين الجماعة المصليّة أمام المذبح وبين العالم. أجسادنا صارت هياكل للروح القدس وصرنا بالتالي مدعوين للقداسة. اتحادنا مع يسوع اللي بالقربان بوحّدنا مع بعضنا البعض وبقوِّينا. منقدّم هالبيت من المسبحة عنيّة العيل حتى تظلّ متحدة مع بعضها البعض ومتّحدة فيك وما تسمح للشر انو يقوى عليها ويكون سبب لتزعزع افرادها ومأساة أبنائها آمين.
4- منتأمل بالبيت الرابع كيف المسيح بالقدّاس يجدّد ذبيحة الخلاص لأجل مصالحة البشريّة مع الله ومع الآخر. حوّلت الخبز والخمر لجسدك ودمك الطاهر وصار الك مسكن على الأرض بالعرق والدمّ والجلد والصليب، دم مخلّصنا الالهي بينسفك لغسل نفسنا من الخطيئة، ومنسأل حالنا اليوم شو المكافأة لفادينا لقاء قطرات الدمّ والآلآم بكل ذبيحة؟ يا ربّ غفرت للخطأة وللقتلة اللي صلبوك وقلتلنا اغفروا 70 مرّة 7 مرات وغيّرت المفاهيم البشرية. علّمنا كيف بالتسامح والغفران منكون عم منتقدّس ومنصير قدوة لغيرنا. عنية الصلبان اللي حاملها كل واحد منا، منصليلك حتى تتحوّل لنعم بتكبّرنا وبتكون موقع لتجلّي صورتك فينا آمين.
5- بالبيت الخامس منشكرك على ابنك وارفع ذبيحة شكر وتسبيح، انت اللي بتغذّينا من جسدك ودمك، بتحفظنا بنعمك بتقوّينا بوقت الصعاب والخوف وبتصبر علينا بوقت الضعف، عظيمة وكتيرة نعمك علينا. منشكرك بهالمسا على كل شيء ومنسلمك ذواتنا بكل اضطراباتها واحزانها وافراحها، لأنو معك وحدك منعرف الفرح الحقيقي وفيك وحدك رجانا وقوتنا. على حضورك الدايم معنا بسر القربان وحلول روحك القدوس علينا منشكرك. ومنقلك وعّي ضمائر الحكام، خلّي الشعوب اللي فِيا فقر وعنف تنعم بالسلام وبالأخص وطننا لبنان وارادتك وحدها تحلّ على عقل وقلب كل انسان. آمين.
|
